Gai-jartzaile Eskola 2015-05-14

"Modu kolektiboan ikuskizun bat eskaintzen dugu eta horrek aurre-lanketa handia eskatzen du"

Onintza Garcia eta Inaxio Usarraldek Bertsozale Elkarteak antolatutako Gai-jartzaile Eskolan hartu dute parte. Urrian hasita gai-jartzaileak, bertsolariak eta beste disziplinetako sortzaileak izan dituzte hizlari zortzi saiotan. Pasa den larunbatean hitz egin genuen Onintza eta Inaxiorekin eta Eskolan landutakoa kontatu ziguten.

Inaxio Usarraldek esperientzia luzea du gai-jartzaile lanean; duela 20 urte aurkeztu zuen lehenengo  bertso-saioa. Txapelketen ostean gaien inguruan gogoetak egin izan badira ere, jaialdietako gaiei buruz gutxi hausnartu dela dio Inaxio Usarraldek eta hori izan zen Gai-jartzaile Eskolan izen-emateko arrazoi nagusia.

Onintza Garciak gutxiagotan egin ditu gai-jartzaile lanak eta orain arte intuizioz jardun dela dio. Formazioa jasotzeko eta berak dituen kezka eta galderak beste kideekin partekatzeko beharra sentitzen zuelako joan da Gai-jartzaile Eskolara.

Jasotako informazio guztia bere galbahetik pasa beharko duela dio Onintzak, baliogarri zaiona hartu eta bere jardunean erabiltzeko. Hala ere, taularatzeari buruz esandakoak eta gaiak jartzeko garaian formulazioak duen garrantzia azpimarratu ditu.

Inaxio Usarraldek balorazio orokorragoa egin du. Gai-jartzaileak bertso-saioaren baitan ardura asko dituela dio, bai saioaren prestaketan baita saioan bertan ere, eta eskola honetan hori aitortu dela dio. Horrez gain, bertso-saioa modu kolektiboan eskaintzen den ikuskizuna izanik, bertsolariek gaur egun baino zeresan gehiago dutela uste du Inaxiok.

Onintza Garcia: "Orain arte intuizioz jarri ditut gaiak, formazio-falta somatzen nuen"
Inaxio Usarralde: "jaialdietan jartzen diren gaiei buruz gutxitan hausnartu izan da"

• 
•