Seigarren edizioa izango da aurtengoa 2015-06-03

"Ahoa Bete Hots" jardunaldiak egingo dira uztailaren 1etik 3ra

 Mintzola egitasmoaren barruan ahozko kultur sorkuntzan ari diren diziplina ezberdinetako aritu eta adituak 2010ean hasi ziren "Ahoa Bete Hots" jardunaldiak antolatzen. Urte hartan ahozkotasunaz aritu ziren, 2011n idatzizkotik ahozkorako jauziaz, 2012an euskalki eta batuaren arteko talkez, 2013an ahozkotasuna lantzeko jolasez eta 2014an transmisioaz. Seigarren edizio honetan ahozkotasunean emozioak eta umoreak duten lekuaz arituko dira.

 Jardunaldiak aurkezten izan dira gaur Amasa-Villabonan Nora Urbizu Arozena (Amasa-Villabonako Kultura eta Euskara zinegotzia eta Mintzola Fundazioko patronatu kidea), Beñat Gaztelumendi Arandia (Mintzola Fundazioko ikerkuntza arduraduna) eta Eñaut Gantxegi Maritxalarrek (EHAZEko kidea eta antzezlea).

 Egitaraua

 Aurtengo "Ahoa Bete Hots" jardunaldiak uztailaren 1etik 3ra bitartean izango dira. Hau da egitaraua:

UZTAILAREN 1a
08:30-09:00  Harrera, agiri banaketa
09:00-09:15  Sar Hitza
09:15-10:15  Emozioen kontrola jendaurrean, Amaia Vazquez psikologoaren eskutik
10:15-11:15  Ipuingintzaren emozioak, Itziar Zubizarreta, "Bularretik mintzora" proiektuaren arduraduna
11:15-11:30  Atsedenaldia
11:45-12:45  Euskal Irria, Asisko Urmeneta marrazkilariaren eskutik
12:45-13:30  Marrizkirriatutako bertsoak, bertso eta marrazki saio berezia. Asisko Urmeneta ariko da marrazten eta Nerea Ibarzabal eta Unai Iturriaga bertsotan.

UZTAILAREN 2a
09:00-10:00  Bertsolaritza praktika emozional gisa, Jone Miren Hernandez EHUko antropologia irakasle eta ikertzailearen eskutik
10:00-11:30  Umorea eta bertsolari txapelketak, hiru hizlarirekin: Lorea Arburua (Bardoak txapelketaren antolatzailea), Imanol Epelde (Putzuzuloko Kopla Txapelketaren antolatzailea) eta Oxan Altuna (Tabernetako txapelketaren antolatzailea)
11:30-12:00  Atsedenaldia
12:00-13:00 Demodé quartet kantagintza eta umorea uztartu dituen esperientziaz hitzaldi kantatua Joli Pascualenaren eskutik

UZTAILAREN 3a (txandalez jantzita joatea komeni da)
09:00-11:00  Clown tailerra. Umorea eragiteko ariketak, Iosu Florentino clown-aren eskutik
11:00-11:30  Atsedenaldia
11:30-13:30  Nola landu emozioak antzerkian tailerra Ander Lipusen eskutik

 Izena emateko epea zabalik ekainaren 22ra bitarte

 Izen-ematea zabalik egongo da bihartik ekainaren 22ra bitarte. Matrikula arrunta 70 eurotan egongo da, baina Antzerkizale, Kantuzale, Ipuin kontalari edo Bertsozale Elkarteetako bazkideek; Aiztondo Mankomunitateko herrietako biztanleek eta ikasle, langabetu eta erretiratuek 50 eurotan egin ahal izango dute matrikula.

 Matrikula egiteko bi aukera daude. Internetez egin daiteke, www.mintzola.eus atarian. Eta telefonoz egiteko aukera ere badago, honako zenbaki honetara deituta: (0034) 943 693870.

• 
•