Duela bost urte antolatu zuten lehenengo aldiz bertso-saioa Elizondoko jaietan eta urtetik urtera geroz eta jende gehiago hurbiltzen da Foruen plazara. Eguraldia lagun, giro bikaina izan zen Xanti eguneko saioan. Aitor Mendiluze, Andoni Egaña, Alaia Martin eta Beñat Gaztelumendi aritu ziren bertsotan. Fernando Anbustegik egin zituen gai-jartzaile lanak.
Eguraldi txarra egin omen zuen duela bost urte lehenengo aldiz Elizondon Xantio Eguneko bertso-saioa antolatu zutenean eta "saioa tristea joan zela" diote Xabier Maia eta Oier Amiano Baztango bertso-eskolako kideek.
Geroztik ordea, geroz eta jende gehiago hurbiltzen da Foruen plazara uztailaren 25eko iluntzean eta bete-betea atera ohi da jaialdia: bai entzule-kopuruaren aldetik, baita bertsolarien lanari dagokionean ere.