Urtarrilaren 30ean izango da Donostian 2016-01-20

Egun osoko festa izango da Bertso Egunean

Nobedade bat baino gehiago izango ditu aurtengo Bertso Egunak. Ohi bezala, egun osoko egitaraua prestatu dute antolatzaileek baina hainbat aldaketekin, batez ere emanaldien kokapenari dagokionez.

Goizeko ekitaldia kalean egin izan da orain arte baina aurten Kursaal pareko Picachilla garagardotegian bertso-saio musikatua egingo da. Ane Labaka, Maialen Lujanbio, Beñat Gaztelumendi eta Miren Amuriza ariko dira kantuan bat-batekoan, eta Rosi Lazkanok eta Nerea Elustondok bertso jarriak eskainiko dituzte. Emanaldia Estitxu Eizagirrek aurkeztuko du eta Idurre Eskisabalek eta Eñaut Asurrabarrenak ere parte hartuko dute gitarraz musikatutako testuak eskainiz. Gidoia eta gaiak lantzeko Ainhoa Agirreazaldegi eta Arkaitz Goikoetxearen laguntza izan dute.

Eguneko ekitaldi nagusia arratsaldeko 18:00etan hasiko da Kursaalen. Aitziber Garmendiak aurkeztuko du saioa eta Unai Iturriaga, Andoni Egaña, Oihana Iguaran, Etxahun Lekue, Fredi Paia, Xabier Terreros, Jon Maia, Oihana Bartra, Julio Soto eta Agin Laburu ariko dira kantuan. Odei Barrosoren 2zio taldea ere zuzenean ariko da.  "Erabakia" izango da aurtengo emanaldiaren ardatz; alegia, bertsolariak antolatzailearen deia jasotzen duenetik oholtzan kantuan hasi arteko erabakiei buruz ariko dira. Aurtengo ideia eta gaiak latzen aritu dira Aitor Mendiluze, Aitor Sarriegi, Eneko Lazkoz eta Urko Casado.

Eta eguna bukatzeko, afaria eta afalosteko saioa. Bi urteren ondoren, berriz Kursaalen egingo da gaueko ekitaldia. Hamabi bertsolari ariko dira kantuan: Amets Arzallus, Unai Mendizabal, Xabi Igoa, Onintza Enbeita, Alaia Martin, Eli Pagola, Maddalen Arzallus, Eneritz Artetxe, Iker Zubeldia, Jexux Mari Irazu eta Unai Agirre. Alaitz Rekondok egingo ditu aurkezle-lanak. Bat-bateko bertsoez gain, bertso-jarriak ere abestuko dituzte, tartean baita musikatuak ere.

Guztira 28 bertsolari ariko dira kantuan 47. Bertso Egun honetan. Goizeko bertso-saio musikaturako ez da sarrerarik behar. Arratsaldeko eta gaueko ekitaldietarako sarrerak www.bertsosarrerak.eus atarian dituzue salgai.

• 
•