Igande honetan hasi eta maiatzaren 22ra bitartean, Bizkaiko Bertsolari Txapelketako udaberriko fasea egingo da 56 bertsolari eta 9 saiorekin. Berrituta dator aurten txapelketa.
Gaur aurkeztu da Bizkaiko Bertsolari Txapelketa Bilbon. Zabu arrosa bat irudi duen txapelketa jauzi bikoitza ematera datorrela azaldu du Maddi Ibaibarriaga Bizkaiko Bertsozale Elkarteko Komunikazio arduradunak: bertsolari bakoitzak bere bertsogintzari emango diona, eta txapelketak berak plazari emango diona. Jauzia handiagoa izan dadin, formatuz aldatuta dator aurtengo txapelketa. Eskualdeetako Txapelketak eta Udaberriko Fasea
Orain arte Eskualdeetako Txapelketetatik sailkatu izan dira Bizkaiko Bertsolari Txapelketan ariko diren bertsolariak. Aurten, ordea, bereizi egin dira bi txapelketak. Azken hilabeteotan ari dira Bizkaiko Eskualdeetako Txapelketak jokatzen, tokian-tokian ahalik eta eragin handiena izateko. Eta igande honetan abiatuko da Bizkaiko Bertsolari Txapelketako Udaberriko fasea, 56 bertsolarirekin. Aurtengoan, eskualde guztietako bertsolariek eman dute izena.
Formatuaz gain, talde antolatzaileari ere haize berria ekarri diola azaldu du Asier Ibaibarriaga Bizkaiko Bertsozale Elkarteko Lehendakariak. Jende berria sartu dela antolakuntzan. Aurtengo aldaketa hausnarketa luze baten emaitza dela azpimarratu du, eta txapelketaren atzean eguneroko lanean oinarritutako proiektu bat dagoela.
Zabua irudi
Birziklatutako materialarekin egindako zabu bat da aurtengo txapelketaren irudia, lehen aipatutako jauzi horren sinbolo. Hitz ugari erabiltzen dira zabua esateko, eta aniztasun hori ere bildu nahiko luke aurtengo txapelketak.
56 bertsolari udaberriko fasean
56 bertsolarirekin abiatuko da udaberriko fasea. Udazkenean, noizbait Bizkaiko Bertsolari Txapelketako finalean aritutako bertsolariak gehituko zaizkio taldeari. Denera 30 izango dira udazkeneko fasean arituko diren bertsolariak.
Oinarri sendoa
Txapelketaren atzean hezkuntza arautuan eta bertso-eskoletan egiten den lana dagoela oinarrian azpimarratu du Asier Ibaibarriagak. Bide beretik mintzatu da Lorea Bilbao Euskara eta Kulturako Bizkaiko Foru diputatua ere. Leire Aragon BBK-ko Gizarte Ekintzaren zuzendariak ere garrantzia eman dio transmisioari eta belaunaldien arteko loturari, eta BBK-k urteetan babestutako BBK Sariketan aritutako bertsolariak txapelketan ariko direla nabarmendu du.
Sarrerak bertan
Aurtengoan sarreren salmentan ere aldaketak izango dira. Sarrerak saio egunean soilik eskuratu ahal izango dira, saioa hasi baino ordubete lehenago, aretoetako leihatiletan. Horrez gain, txapelketa jarraitzeko aukera izango da bai helbide honetan, eta baita Bertsoa.eus atarian ere.