Eskolartekoa 2016-05-02

Aste honetan jokatuko dira Bizkaiko Eskolarteko kanporaketak

 Aste honetan abiatuko da Bizkaiko Eskolarteko Bertsolari Txapelketa. Denera lau kanporaketa jokatuko dira bihar hasi eta ostiralera bitarte:

 -Maiatzaren 3an, asteartez, Getxoko Azebarri kultur elkartean arratsaldeko 17:30ean
 -Maiatzaren 4an, asteazkenez, Bermeoko Eleizalde ikastolan, 15:00etan
 -Maiatzaren 5ean, ostegunez, Deustuko Berbaizu euskara elkartean, 17:00etan
 -Maiatzaren 6an, ostiralez, Elorrioko Txintxirri ikastolan, 15:00etan

 Egin beharreko lanak

 Saio bakoitzak bi fase izango ditu. Lehenengo zatian bertsolari guztiak ariko dira kantuan, eta honako ariketa hauek egingo dituzte:

 -Hitza emanda bertsoa, gehienez hamarreko handian
 -Lau oinak emanda bertso bat
 -Ofiziotan bina bertso, zortziko handian

 Bigarren fasera sailkatzen diren bertsolariek beste hiru bertso kantatuko dituzte:

 -Ofiziotan, bina bertso, zortziko txikian
 -Kartzelako lana: bakarka, gai bati bertso bat, gehienez hamarreko handian

 Finala maiatzaren 22an

 Finala maiatzaren 22an izango da Getxoko Fadura kiroldegian. Egun osoko festa prestatzen ari dira. Goizean idatzizko eta bat-bateko finalak izango dira. Eguerdian bazkaria egingo dute, eta bazkalostean bertso-eskolek tartea izango dute. Azkenik, arratsaldean Bizkaiko Bertsolari Txapelketako udaberriko faseko kanporaketa izango da Faduran bertan.

 Nahi izanez gero bazkaritarako txartelak eta egun horretako kamisetak eskuragarri daude jada www.bertsosarrerak.eu atarian.

• 
•