18 bertsolarik parte hartuko dute 2017ko Arabako Bertsolari Txapelketan. Otsailaren 5ean Langraizen abiatuko da txapelketa eta apirilaren 1ean jokatuko da finala, Gasteizko Printzipal antzokian.
Oinarriari begira aurkeztu dute gaur
Arabako Bertsolari Txapelketa. 2016an 35 urte bete ziren Arabako lehenengo bertso-eskola sortu zenetik. Aiaraldeko Bertso-Eskolak eman zituen lehenengo urratsak Laudioko Tunel tabernan. Urtebete beranduago sortu zen bigarren bertso-eskola, Gasteizen.
Laudioko Tunel tabernan aurkeztu dute gaur 2017ko Arabako Bertsolari Txapelketa.
Sarea jostera Gaurko prentsaurrekoan Oier Suarezek azaldu ditu txapelketaren nondik norakoak. Azaldu duenez, Arabako bertso-eskolen arteko sarea josi nahi dute aurtengo txapelketaren bidez: "zer dira, adibidez, Arabako bertso-eskolak, kantuan dibertitu nahi duten horien sare eder bat baino?".
18 bertsolari 18 bertsolari ariko dira aurtengo txapelketan: 2015ean finalista izan eta izena eman duten 5 bertsolari eta aurrekanporaketatik sailkatutako beste 13k.
Peru Abarrategi izango da partehartzaile gazteena 20 urterekin eta
Rikardo Gonzalez de Durana, berriz, zaharrena, 58rekin. Rikardo Gonzalez de Durana Gasteizko bertso-eskolako sortzaileetako bat izan zen 1982an.
Serapio Lopezek ere parte hartuko du. Arabako lehenengo bertso-eskolako sortzaileetako bat izan zen 1981ean Aiaraldean.
Aurtengoan 2015ean parte hartu ez zuten 5 bertsolarik eman dute izena:
Andere Arriolabengoak,
Asier Otamendik,
Izar Mendigurenek,
Rikardo Gonzalez de Duranak eta
Serapio Lopezek. Eta orain dela bi urte buruz burukoan aritu ziren
Manex Agirrek eta
Iñaki Viñasprek ere eman dute izena.
Bertsolari bakoitzak bi saio Aurtengoan bertsolari bakoitzak bi saiotan kantatzeko aukera izango du, bi itzulitara egingo baitira finalaurrekoak. Lehenengo itzulian Langraizen, Dulantzin eta Zigoitian jokatuko dira saioak otsailaren 5ean, 12an eta 19an hurrenez hurren. Bigarren itzuliko saioak Legution, Laudion eta Aramaion jokatuko dira martxoaren 4an, 11n eta 18an. Finala apirilaren 1ean izango da Gasteizko Printzipal Antzokian.
Aurkezle lanetan 6 lagun jardungo dira, eta 7 gai-jartzailez osatutako talde bat ariko da gaiak prestatzen. Epaile taldea, berriz, 7 lagunek osatu dute.
Sarrerak eskuragarri Finalaurrekoetarako sarrerak leihatiletan eskuratu ahal izango dira. Lehenengo itzulian sarrera arrunta 6 eurotan salduko da eta 4 eurotan Bertsozale Elkarteko Bazkideentzat. 16 urtetik beherakoek dohainik eskuratu ahal izango dituzte sarrerak. Finalaurrekoetako bigarren itzulian, berriz, 8 eurotan salduko dira sarrera arruntak, 6 eurotan bazkideen sarrerak eta dohakoak izango dira 16 urtetik beherakoenak.
Finaleko sarrerak numeratuak izango dira eta Printzipal Antzokiak emandako bideetatik soilik erosi ahal izango dira: Aretoko leihatiletan, Printzipal Antzokira telefonoz deituta (945 161 045) edo
internetez.