Hitzetik Hortzera 2017-02-17

"Trabajadoriak" bertso trama eskainiko du Hitzetik Hortzerak

 Frankismo garaian preso hartu eta behartutako lanetan aritu zirenei "Trabajadoriak" deitzen zitzaien Lesaka eta Oiartzun inguruetan. Aritxulegi inguruko errepide eta tunelak eraikitzeko lanetan aritu ziren, besteak beste. Ehunka lagun aritu ziren lan horietan, Inazio Eizmendi "Basarri" bertsolari ezaguna tartean. Langile horien inguruko bertso trama egin zen joan zen larunbatean Aritxulegin, eta trama horren ingurukoa izango da igandeko Hitzetik Hortzera.
 
 Aritxulegiko bertso trama

 Amets Arzallus, Andoni Egaña, Eneko Fernandez eta Alaia Martin aritu ziren bertsotan, Trabajadorien lanari ahotsa jarriz, Iban Garro gidari zutela. Trama hasi eta buka, pertsonaia bat gorpuztu zuen bertsolari bakoitzak, eta gerraosteko gertaera haien inguruan umorea eta sakontasuna tartekatu zituzten saioan zehar.

 Elkarrizketa sorta

 Tramari testuingurua emateko, elkarrizketekin osatuko da igandeko programa. Euskal Herriko azken errementarietako bat da Pedro Lanz, eta Lesakan bere lanekin osatutako erakustokian ariko da hizketan. Gerraostea hurbiletik ezagutu zuen, bere familia jazarri baitzuten Frankismoaren aldekoek. Bere aita behartutako lanetan aritu zen Oiartzun eta Lesaka inguruetan, eta garai haietako testigantza eskainiko du.

 Eta Estitxu Arozena ere ariko da hizketan igandeko programan. Trama prestatzeko lanetan aritu zen Iban Garrorekin batera, eta tramaren nondik norakoak azaltzeaz gain emanaldia antolatzeko motiboen berri ere emango du.

 Igandean ikusgai

 Hori dena eta askoz gehiago igande honetan izango da ikusgai ETB1en, arratsaldeko 15:00etatik aurrera. Eta laster interneten ere bai, EITB Nahieran-en.
 

• 
•